NATIONAL – Ginmanduhan han Department of Energy an mga kumpanya han krudo nga igpabilin an sakto nga imbentaryo han produkto hiton petrolyo ha butnga han padayon nga paghitaas han tensiyon ha Middle East, particular ha natatabo nga kasamok ha butnga han Israel ngan Iran.
Sumala kan DOE Officer-in-Charge nga hi Sharon Garin, an mga kompanya han lana in kinahanglan magsiguro nga mayda hira 30-adlaw nga supply han krudo ngan 15-adlaw nga imbentaryo han mga refined petroleum products. Ini in para mamentinar an marig-on nga imbentaryo han mga lana ngan malikayan an kakulangan kun magtikagrabe pa an krisis ha rehiyon.
Ha pareho nga panahon, andam gihapon an DOE nga ipatuman an ayuda ngan subsidiya han gobyerno ha ilarum han naeksister nga mga balaudnon, sugad han TRAIN Law, kun umabot an presyo han lana hin $80 kada bariles ha world market.
Samtang, an DOE in padayon nga mahugot nga nagbabantay han mga oil depot ngan pankalibutan nga mga presyo han lana agud madagmit nga maipatuman an kaangayan nga mga pitad agud maprotehiran an mga kunsumidor ngan apektado nga mga sektor sugad han transportasyon ngan agrikultura.
