NATIONAL – Gin aghat ni anay Health Secretary ngan House Deputy Majority Leader Janette Garin an Department of Health (DOH) nga kinahanglan usa nga agresibo nga aksyon an pagbuhaton para solusyunan an naghihinitaas nga kaso han leptospirosis.
Ginbuhat ni Garin an pahayag mahuman nga mahipatik an paghitaas han kaso han leptospirosis ha National Kidney and Transplant Institute (NKTI) kun diin an ira gymnasium in ginhimo na nga ward para ha mga leptospirosis patients.
Ginmalatumat han lady solon nga ine in wake-up call na ha ahensya para mas magin agresibo hira ha pagsolusyon ha nasabi nga sakit labi na ha panhatag hin tambal.
Dugang pa hine, kinahanglan daw nga pahinumduman han DOH an pubiko kasumpay ha epekto han leptospirosis labi na han kakusgan han Bagyong Carina.
Ginbatikos naman ni Garin an DOH mahitungod han pagkukulang hine nga maghatag hin doxycycline, medisina para malikayan an sakit nga leptospirosis.
Ginsagdunan gihapon hine an publiko nga dayun nga magpa-kunsulta in kaso maka-eksperyensya han mga sintomas han leptospirosis.
