TACLOBAN CITY – Gin klaro han Tacloban City Police Station 2 pinaagi kan Station Commander PMaj Shenna Layog, nga dire rugby an iginhuwad han pulis ha ulo han nagra-rugby nga kabataan kundi softdrink nga dara han mga ine.
Nagsarang manggud ha social media an kuha han video kun diin makikit-an nga mayda ginhuwad han pulis ha ulo han bata.
Sumala kan Tacloban City Police Station 2 Station Commander, PMaj Shenna Layog, basar han iya pamakiana ha nasabi nga police officer in igin asoy hine nga kumita daw hiya nga mayda rugby an ulo han bata sanglit gin prubaran hine tanggalon an nasabi nga rugby pinaagi han paghuwari han soft drinks.
Subay pa han imbestigasyon, mayda nagtawag ha ira kasumpay han mga kabataan nga nagamit hin rugby nga ginrespondehan naman hine nga police officer, kun diin pag-abot han nasabi nga pulis ha lugar in nakit-an daw hine nga mayda dara nga rugby ine nga kabataan kun diin pagkita naman han mga kabataan ha pulis in nakigpaplanatay pa an mga ine ha pulis hasta nga umabot ine ha lugar han insidente.
Gin pakianhan naman han pulis ine nga kabataan kun nag-aaragno an mga ine ngan bumaton naman daw an mga ine nga nagamit hira han rugby kun diin mayda pa daw magraot nga yakan ine nga kabataan.
Nakigsumpayan naman na an nasabi nga istasyon ha kag-anak han mga kabataan kun diin sumala han nanay han usa nga bata in tulo na kaadlaw nga waray uuli an iya anak ngadto haira.
Samtang, padayon pa gihapon an pamiling han mga kapulisan hine nga kabataan kun diin kaupod han usa Women and Children Protection Desk (WCPD) personnel an anay han usa nga bata agud mabilngan diin nagtatago ine nga mga kabataan.
Nahibaruan gihapon nga nag-uukoy ha northern barangay han syudad ine nga mga kabataan.
Ha lain nga bahin, gintagan naman hin restriksyon an dabi nga pulis samtang padayon pa an gindudumara nga imbestigasyon.
