Gin hangyo ni National Bureau of Investigation (NBI) Director Melvin Matibag ha House prosecution panel nga maiskedyul hin mas sayo an iya pagtestigo ha impeachment trial ni Vice President Sara Duterte agud diri madelatar an hearing.
Ha surat nga igin padara kan lead prosecutor ngan Batangas Rep. Gerville Luistro, igin malatumat ni Matibag nga nakatalaan hiya umatender hin usa nga summit han mga law enforcement leaders ha Thailand ha Hulyo 21 ngan 22, rason kun kay ano gin hangyo hini nga makaatubang ha Senado ugsa an Hulyo 20.
Subay kan Matibag, personal niya nga rerepresentaran an NBI ha pagbubuhaton nga meeting kaupod an mga opisyal han Federal Bureau of Investigation ngan Royal Thai Police kanit ha scam ngab transnational organized crime sa Asia-Pacific.
Mahitungod hini, gin hangyo hini nga mahiuna an iya testimonya agud diri maapektuhan an dalagan han impeachment proceedings.
Gin lalauman nga maghahatag hi Matibag hin testimonya kanit ha imbestigasyon han NBI ha daw paghuhulga ni Duterte kontra kanda Pangulong Ferdinand Marcos Jr., First Lady Liza Araneta-Marcos, ngan anay House Speaker Martin Romualdez.
An mao nga alegasyon in usa ha mga pangunahon nga basaran han Articles of Impeachment nga igin haon kontra ha bise presidente.
