TACLOBAN CITY– Ginpaangbit han Department of Interior and Local Government (DILG) Region 8, an ira mga nagin accomplishment ha ilarom han administrasyong Marcos.
Sumala kan Arnel, Agabe, Regional Director, Department of Interior and Local Government DILG Region 8, nga pira ha ira nagin accomplishment an Support to the Barangay Development Program, kun diin mayda na hira maabot 394 nga mga SBDP nga nakompleto han nakalabay nga bulan.
An nasabi nga mga proyekto in gindudumara pinaagi hiton ira pakikipag sumpayan ha mga Local Government Unit (LGU), agud nga magkamayda hin maupay nga resulta an mga plano nga proyekto nga igkakaupay hiton ngatanan.
Ginpaangbit pa hine, nga gin-alutagahan ine hin pondo nga nagkakantidad hin P1B. 381M. 505 thousand, ngan ine in gintatawag nga bulig pinansyal nga ginhahatag han gobyerno pinaagi naman han NTF-ELCAC.
An mao nga proyekto in ginhihimo ha mga tay-aw nga lugar, agud nga makaghatag hin opurtunidad nga makasabay an mga nag-uukoy ha mao nga lugar ha pag-ursa han nasud Pilipinas.
Pira ha mga nagin proyekto han mga ine an gintatawag nga Farm to Market Roads, School buildings, Electrification Projects, Water Systems, and Health Stations.
Ginbabana-bana naman nga maabot ha 399, 585 nga mga benepisyaryo an nakatagamtan hine ha bug-os nga Eastern Visayas.
