Iginduon han Department of Foreign Affairs (DFA) nga makakabulig ha Pilipinas an pagkakamay-ada hin non-permanent position ha United Nations Security Council (UNSC) ha masunod nga tuig.
Ha pagdungog han Senado in ginpakiana ni Senator Rodante Marcoleta kun ano an magigin gamit o makukuha han nasud ha UNSC mahuman nga dire makaatender ha hearing kasumpay ha sitwasyon han mga Pilipino ha Middle East hi Foreign Affairs Secretary Maria Theresa Lazaro nga aadto ha Estados Unidos para ha kandidatura han Pilipinas ha UNSC.
Pag-eksplikar ni Foreign Affairs Assistant Secretary Germina Aguilar-Usudan, target han Pilipinas nga mahurar ha UNSC mahitungod nga maidususo han nasud an interes han nasud ha UN arena ngan an mga prinsipyo han pagkakaurusa, ngan igduso an gobyerno han nasud.
Matatagan hin leverage an Pilipinas ha mas damo nga aspeto kun magkamay-ada hin posisyon ha UN Security Council.
Manunumduman nga dida han nakalabay nga tuig, nagpatapod hi Presidente Ferdinand Marcos Jr. nga padayon nga igduduso an rule of law ngan an mahimyang nga resolusyon ha mga dire pagkakaintindihay agud mapabilin an international peace ngan security kun mahurar ha non-permanent seat ha UNSC.
