BORONGAN CITY – Padayon nga ginpapakuru-kusog han Technical Education and Skills Development Authority (TESDA) Eastern Samar an devolution strategy o an plano nga pagbalhin han kapas ngan responsibilidad tikang ha central government tikadto ha lower government han mga programa hine.
Ine an iginpahibaro ni TESDA Eastern Samar Provincial Director, Dr. Antonio Waniwan.
Panuyo han nasabi nga estratehiya nga mas mapadukwag pa an akses han teknikal nga edukasyon ha mga ka-barangayn pinaagi han aktibo nga partisipasyon han local government units (LGUs).
Subay manggud ha Section 29 han Republic Act 7796 o TESDA Act of 1994, mayda mandato nga ighatag ha LGUs an mga responsibilidad ha pagpatuman han mga skills traning programs ngan iba pa nga gamit hine.
Sumala pa kan Waniwan, ginkikita han nasabi nga polisiya kumo epektibo nga mekanismo agud mas mapahusay pa an paghatag han serbisyo labi na mga barangay.
Pinaagi han devolution in ginlalauman naman nga mas damo nga kablas an makaka-benepisyo han de-kalidad nga teknikal nga edukasyon, nga mag-aabri naman hin bag-o nga oportunidad para ha pangunabuhi ngan pag-ribhong han lokal nga ekonomiya. (via Bombo Shiela Encio)
