TACLOBAN CITY – Naghatag hin pagklaro an Department of Education Tacloban City Division kasumpay han nagsarang nga video ha social media kun diin daw waray pasudla han usa nga iskuylahan ha Norte Tacloban an mga kag-anak nga na-late han call time o ginkasarabutan nga oras.
Sumala kan Department of Education Tacloban City Division Information Officer, Dr. Nilo Eder, ginkasarabutan han mga kag-anak ha damo na nga mga pagharampang an nasabi nga call time, kun diin kinahanglan nga pag-alas-6:30 ngada ha alas-7 han aga in aadto na an mga kag-anak nga istudyante ha iskuylahan.
Dugang pa hine, gin eksplikar ha mga kag-anak an protocol han nasabi nga aktibidad mahitungod nga magtitikang an programa pag-abot tamak han alas-8 impunto han aga.
An kadire daw pagpasudla ha mga kag-anak in temporaryo la mahitungod nga papasudlon man an mga ine mahuman la an preliminaries han program sugad han Prayer, pagkanta han Lupang Hinirang, ngan iba pa, kun diin ine in agud nga mapabilin an solemnidad han programa ngan dire madisturbo an dalagan an programa.
Nahibaruan gihapon nga nahitabo an insidente dida han banda alas-8:30 han aga, kun diin 30 minutos an nakalabay han magtikang an programa, ngan sobra usa kaoras tikang han ginkasarabutan nga call time.
