Mahugot nga ginpapahimatngun han Department of Education an publiko nga dire obligado mag-abono o maghatag hin kontribusyon an mga magturutdo, estudyante, ngan kag-anak ha Brigada Eskwela.
Ha pahayag han DepEd dida han Biyernes, Hunyo 5, ginduon han ahensya an mahugot nga pagpapatuman han “No Collection Policy” nga nagdidire ha piniritay nga pangangaro hin amot tikang ha mga miyembro han school community.
Sumala ha DepEd, an Brigada Eskwela in dire usa nga fundraising activity kundi usa nga “whole of community” nga inisyatiba nga may panuyuan ig-andam an mga eskuylahan para ha nagtitikaharani nga klase.
Ginsigurado gihapon han buhatan nga padayon nira ginpapakusog an suporta ha mga iskuylahan ha pamamaagi han School Maintenance and Other Operating Expenses, sugadman ha bulig han magkadurudilain nga ahensya han gobyerno, local government units, partners, ngan mga volunteer.
