TACLOBAN CITY – Ginpahayag han Department of Education (DEPED) Regional Office 8 nga maabot na ha 94% han mga eskwelahan ha bug-os nga rehiyon an nakapagdumara na hin limited face to face classes.
Sumala kan Jasmin Francisco Calzita, tagapagyakan han DEPED Regional Office 8, tungod han malinampuson nga pilot implementation ngan expansion han limited in-person classes, haros tanan na han mga eskwelahan ha rehiyon an nakapagdumara hini.
Target naman han DEPED Region 8 nga magin 100% na an mga eskwelahan ha Sinirangan Bisayas an makakagdumara hin limited face to face classes pag abot han masunod nga school year 2022-2023.
Ha pagkayana in padayon nga ginbubuligan han DEPED 8 an nabibilin nga mga eskwelahan ha rehiyon nga waray pa makagdumara han limited face to face classes agud nga masiguro nga magiging hapsay gihapon an ira pagdumara hini.
