TACLOBAN CITY — Nadakop ha ikaduwa nga higayon an usa nga dentista ha ginbuhat nga buy bust operation han Phil. Drug Enforcement Agency (PDEA) ha Purok 2 Barangay West Awang, Calbayog City.
Ginkilala an nadakop nga hi Dr. Evaristo Tamonan Y Rosales o mas kilala nga “Baret”, usa nga dentista ngan residente han mao nga lugar.
Nakuha tikang kan Tamonan an 11 pcs nga medium size han gintutuuhan shabu, drug paraphernalias ngan Php 2,570 .00 nga cash ngan Php 500.00 nga buy bust money.
Sumala kan PDEA Team leader Floro Katangkatang, Jr., nga an gintutuuhan nga shabu nga nakuha ha suspek in may estimated street value nga PhP400,000.00.
Dida han tuig 2015, an mao nga dentista in nadakop han mga otoridad pinaagi han search warrant ha iya panimalay kun diin may nakitan nga gintutuuhan shabu ha iya kwarto. Hiya in nadakop ngan umatubang ha kaso nga pagtalapas han Comprehensive Dangerous Drugs Act or Republic Act 9165, pero nakalaya matima nga ig dismiss an iya kaso han Regional trial Court Branch 32 Judge Noli Penaflor.
Ha pagkayana in paslak na ha PNP Calbayog Station lock-up cell ngan nakatalaan naman yana nga adlaw nga magpailarom ha Inquest proceedings para ha violasyon han RA 9165 ha City Prosecutor’s Office an mao nga dentista.
