TACLOBAN CITY – Umabot na ha Properidad, Agusan del Sur an mga atleta kaupod an bug-os nga delegasyon han Sinirangan Bisayas para ha tikaharani nga Palarong Pambansa 2026.
Sumala kan Department of Education Eastern Samar Division Information Officer, Abner Aclao, gintunga ha tulo ka-batch an biyahe han delegasyon kun diin lumakat an syahan nga batch dida han Mayo 18, ngan kakulop nga adlaw in nakompleto na an delegasyon mahuman nga umabot an urhi nga batch.
Ada naman ha 607 an kabug-usan nga ihap han delegasyon nga kumadto ha Agusan del Sur, kun diin ha nasabi nga ihap in kalakip na hini an mga coaches, assistant coaches, ngan chaperones.
Samtang, mahitungod han kapaso han panahon in gintagan na an mga atleta hin health kit agud masigurado an ira panlawas sugadman in ginsisigurado gihapon han mga coaches ngan assistant coaches nga hydrated pirmi an mga atleta agud malikay ha sakit.
Ha lain nga bahin, mapaso naman nga ginkarawat han mga taga-Agusan del Sur an delegasyon han Sinirangan Bisayas.
Mag-iiha an Palarong Pambansa 2026 tinikangan Mayo 24 kutob Mayo 31.
