Ginmalatumat ni anay Anakalusugan Party-list Rep. Mike Defensor nga waray la anay hiya plano magpasaka hin kaso kontra kan National Bureau of Investigation (NBI) Director Melvin Matibag ha kaluyo han reklamo nga qualified human trafficking nga iginpasaka ha iya ngan ha iya pamilya.
Ha pakighimangraw han media ha butnga han rally han Iglesia Ni Cristo (INC) ha EDSA People Power Monument dida han Martes, ginmalatumat ni Defensor nga huhulaton nala niya an sakto nga pamahon ugsa kasuhan hi Matibag.
Igindugang pa hini nga ha kaluyo han nauan nga pagsasalawad hin reklamo kaupod an 18 bodyguards ni anay kongresman Zaldy Co, hira pa an gin iimbestigahan.
Dida han Hunyo 26, nagsalawad an NBI hin reklamo nga qualified human trafficking, usa nga kaso nga dire pwede pyansahan, kontra kanda Defensor, iya asawa nga hi Julie Rose Defensor, ngan an ira mga anak nga hira Michaela ngan Miguel Gabriel Defensor.
Sumala kan Defensor, naiintidihan niya nga posible kaparte han politika an reklamo nga ginpasaka ha iya, pero ginpahayag hini nga dire niya maintindihan an pagtratar ni Matibag ha institusyon han NBI.
Ginklaro gihapon hini nga dire an mga empleyado han NBI an iya gintutudlok kundi hi Matibag.
Ginpahayag naman ni Defensor nga damo an iya nakakarawat nga tawag nga mensahe tikang ha mga tawo nga mayda kangalas kan Matibag.
Ha yana, waray pa iginpapagawas nga opisyal nga pahayag hi Matibag kasumpay han mga nagin pahayag ni Defensor.
