Naka-andam an defense team ni anay Presidente Rodrigo Duterte nga ig presenta an counter evidence kun umatubang na an anay Presidente ha International Criminal Court (ICC) ha Setyembre 23.
Ha usa nga redacted document nga mayda petsa nga Setyembre 2, igin pahibaro han lead defense lawyer ni anay Presidente Duterte nga hi Nicholas Kaufman ha Pre-Trial Chamber 1 an mga piraso han ebidensya nga iya igpapasa para ha confirmation of charges hearings nga masuporta ha mga argumento kontra ha mga dokumento nga nagsusulod han kaso kontra ha anay presidente.
An notification han defense team in subay ha Rules of Procedures and Evidence han ICC nga nagmamando ha defense nga maghatag hin listahan han mga ebidensya ha korte hin dire malahos hin 15 kaadlaw ugsa an nakatalaan nga pagdungog.
Ha Setyembre 23, nakatalaan nga magtikang an upat kaadlaw nga confirmation of charges hearing para ha gin aakusa nga crimes against humanity kontra ha anay Presidente han Pilipinas.
Dinhi in tutudlukon han korte kun mayda o waray supresyente nga ebidensya para ha kaso kontra kan Duterte, nga magigin basaranan kun igpapadayon an trial.
