NATIONAL NEWS– Kumpirmado an pagbulig nira anay Senadora Leila de Lima ngan human rights lawyer Chel Diokno ha prosecution team han Kamara para ha nagtitikaharani nga impeachment trial kontra kan Vice President Sara Duterte.
Babalyuan nira an duha nga miyembro han prosekusyon nga napirdi han nakalabay nga piniliay.
Hi De Lima an syahan nga nominado han Mamayang Liberal (ML) party-list, samtng hi Diokno in tikang ha Akbayan.
Subay ha partial ngan unofficial results, nangunguna an Akbayan ha party-list race nga mayda 2.8 milyong botos.
Sulod naman ha top 63 an ML, sanglit nga posible nga makakuha gihapon ine hin lingkuran ha 20th Congress, ngan parehas an mga ine manunumpa ha Hulyo.
Ginkarawat nira De Lima ngan Diokno an offer kumo kaparti han ira adbokasiya para ha kamatuoran ngan hustisya.
