CARIGARA, LEYTE – Nabukad han mga militar kaupod an kapulisan ha bukid nga parte han Sitio Eraya, Zone 3, Brgy. Cogon, Carigara, Leyte an mga de-kalibre nga armas ngan dokumento nga ginpapanag-iyahan han mga rebelde nga grupo.
Sumala kan Philippine Army 8th Infantry Division 802nd Infantry Brigade Civil Military Operation Officer, Maj. Ma. Angela Jane Gaitera, an malinampuson nga pagka-diskubre han nasabi nga mga armas in pinaagi han kooperasyon han kumunidad, kun diin ine an nag-report ha mga otoridad han lokasyon hine.
Gintotoohan naman nga ginpapanag-iyahan an nasabi nga mga armas han mga salin-salin nga membro han Platoon 2 IC-LEVOX han CPP-NPA Eastern Visayas Regional Party Committee.
Pira han mga narekober nga durante han operasyon in an masunod: usa nga M16 rifle, usa nga hand grenade, 118 nga live ammunition hin 5.56 rounds han M16, tulo nga haglipot nga magazines, usa nga basiyo hin bala, duha nga improvised blasting cups, mga subersibo nga dokumento, usa nga tablet (gadget), lima ka-kilo hin bugas, backpack nga mayda sulod nga mga panapton, ngan magkaduru-dilain nga medical paraphernalias.
Samtang, gin dayaw naman ni 802nd Infantry (Peerless) Brigade Commander BGen. Noel Vestuir an sagunson ngan mahugot nga kooperasyon han mga membro han kumunidad ha kampanya kontra-insurhensiya han gobyerno.
Gin aghat gihapon hine an mga nasasalin nga mga membro han New People’s Army ha Leyte nga mag-surender na ha mga otoridad agud makatagamtam han mga ginhahatag nga programa han gobyerno nga makakabulig ha ira para han panibag-o nga kinabuhi.
