Iginduduso han magbugto nga Senate Minority Leader Alan Peter Cayetano ngan Senator Pia Cayetano an dayun nga pagpapadig-on ha panukala nga nagbubutang hin automatic suspension o otomatiko nga pag-iban ha excise tax ha gasolina ngan iba pa nga produkto nga petrolyo.
An panukala in ginsalawad ha butnga han paghitaas han presyo han lana, resulta han nagtitikaduro nga tensyon ha Middle East.
Ha ilarom han Senate Bill 1927 in gin amyendahan an National Internal Revenue Code of 1997 nga syahan na nga ginbag-o dida han ginhimo nga balaod an TRAIN Law.
Tatagan hin kapas an presidente nga suspendihon o ibanan an fuel excise tax subay na gihapon ha rekomendasyon han Development Budget Coordination Committee ngan kun umabot ha $80 per barrel an presyo han lana ha world market.
Kun mawara na an nasabi nga kondisyon o umubos na an presyo han crude oil ha world market in otomatiko nga mahuhuman gihapon an suspensyon.
Makakabulig an nasabi nga pitad agud madagmit nga makaresponde an gobyerno, mapugngan an padayon nga paghitaas han presyo han gasolina, ngan maproteheran an mga kunsumidor hin dire na kinahanglan maghulat hin panibag-o nga balaod.
