![](https://img.bomboradyo.com/tacloban/2020/09/120126019_3291603624260134_4210807470571351584_n.jpg)
TACLOBAN CITY – Brutal nga ginpatay han mga gintutuohan nga New People’s Army (NPA) an usa nga dati nga rebelde nga sumurender na ha gobyerno ha Barangay Nagpapacao, Matuguinao, Samar.
Sumala ha report tikang ha 8th Infantry Division, an biktima in usa nga 50 anyos nga parag uma nga ginngangaranan kan Carlos Diaz kon diin sumurender ini ha gobyerno dida han nakalabay nga Agosto 28.
Nagawas ha imbestigasyon nga nagtatrabaho ini ha iya lugitan han umabot an armado nga mga NPA ngan ginpanmumusil ini ha iba iba nga parte han iya lawas kon diin ginpuruhan han bala an iya nawong.
Sumala naman kan Matuguinao Mayor Aran Boller waray pa kakuntento an mga rebelde ha pagpusil han biktima ngan ginsamad pa hini an iya duha nga teel.
Nagtutuo gihapon hi Boller nga mayda mga indibidwal nga nagpapaluyo ha tigda nga pagdamo han mga NPA ha ira lugar.
“I think there is someone else nga gusto maghadi dide nga nagfi-finance ngan nadiri nga magin magin mamingaw an amon lugar kay han nakalabay ginlabugon gihapon han landmine an nag CSP dide”, an pamahayag ni Mayor Boller ha interview han Bombo Radyo.
Ginpahayag naman hiton Commanding Officer han 19th Infantry Battalion nga hi Lieutenant Colonel Jasper Justito Pecson nga an brutal nga pagpatay han biktima in usa pamaagi para hadlukon an komunidad.
“The New People’s Army was doing atrocities in order to instill fear to their former members and supporters and even kill people in the communities who contradict their propaganda”, pamahayag ni Pecson ha usa nga statement.
Mababaruan nga han nakalabay nga tuig maabot hin 150 nga mga anay myembro han New People’s Army an sumurender ha Matuguinao, Samar kon diin ginproseso liwat an ira ayuda tikang ha gobyerno ha ilarom han Enhance Comprehensive Local Integration Program ( E- CLIP ).