Sumaka na ha P6.16 bilyon an kabug-usan nga danyos ha imprastraktura samtang maabot namanha P2.32 bilyon an nawara ha sektor han agrikultura kasunod han padayon nga pandestruso han Southwest Monsoon o Habagat, sumala ha Office of the Civil Defense.
Basar ha notisya han OCD Disaster Preparedness Service, maabot ha 724 nga lugar na ha bug-os nga nasud an direkta nga naapektaran han maraot nga panahon, grabi nga pag-uran, ngan mga pagbaha.
Ha pagkayana, padayon an gindudumara nga beripikasyon han mga otoridad ha mga nagkaruruba nga tulay, karsada, ngan iba pa nga pampubliko nga pasilidad, pati na gihapon ha mga nagkaruruba nga pananom ngan humayan.
Ginsigurado naman han OCDa nga nakatutok an ira buhatan ha padayon nga pakikipag-sumpayan ha mga lokal nga pangobyernuhan ngan iba pa nga ahensya han gobyerno agud madagmit nga maidul-ong an kinahanglan nga bulig ha apektado nga komunidad.
