TACLOBAN CITY – Nagin malinampuson an gindumara nga pinakadako nga dance showdown ha bug-os nga Sinirangan Bisayas, dida han nakalabay nga Sabado, Agosto 2, ha Tacloban City Convention Center (Astrodome).
An nasabi nga paisan-isan nga gintawag nga Dance Wars XVI: Elevate in gin organisa han UP Runggiyan ngan nagtikang dida pa han Nobyembre 2005 ngan ha pagkayana in aada na ha ika-20 katuig.
Gin partisiparan naman ine hin 29 nga contestants tikang ha magkaduru-dilain nga parte han rehiyon kun diin nakuha han grupo nga Astrophile an kampeonato, 2nd placer naman an Anointed, ngan 3rd placer an Hype.
Ginkilala gihapon kumo Dance Warrior hi Rain Dember Sumido.
Nakuha naman han La Paz Dance Community an Special Award nga People’s Choice Awards, ngan ginkilala kumo Crowd’s Favorite ngan Best in Costume an Astrophile.
Samtang, kumarawat naman hin P20,000, tropeo, ngan Certificate of Recognition an nag-kampeon, P15,000, tropeo, ngan Certificate of Recognition para han 2nd placer, ngan P10,000, tropeo, ngan Certificate of Recognition naman para han 3rd placer. Kumarawat hin P2,500 an ginkilala nga Dance Warrior.
Sumala kan Camille Rose Centino, organizer han nasabi nga kompetisyon, dire la an paisan-isan basta-basta nga pagsayaw mahitungod nga panuyuan hine nga makag-hatag hin bulig ngan kalipay ha kumunidad o iskuylahan nga ira mapipili, kun diin ine gintatawag nga Runggi-Halad—usa nga flagship program han nasabi nga organisasyon.
An nagin judges han kompetisyon in mga kilala nga dancers ha national stages—amu hira Jhorel Zapanta han FemmeMNL, Jun Junio han Manoeuvres, ngan Raymond Saquisame han Power Impact Dancers.
