NATIONAL NEWS – Igdudungan han Metropolitan Manila Development Authority (MMDA) an paghingayad han mga guba nga karsada, kadungan han long weekened kutob ha Lunes, Agosto 26.
Subay ha MMDA, pira nga pangunahan nga karsada ha Metro Manila an magpapailarom ha road repair kaupod an mga masunod; pira nga parte han EDSA, partikular na an West Avenue, North Avenue, Quezon Avenue, Bansalangin ngan Lanutan ha Quezon City; Monumento ha Caloocan, ngan Ayala tunnel ha Makati.
Kaupod gihapon an pira nga parte han Tandang Sora Avenue, Mindanao Avenue ngan Commonwealth Avenue ha Quezon City; Gen. San Miguel street ha Caloocan, ngan Roxas Boulevard harani ha EDSA flyover ha Parañaque.
Pira nga parte han mga nasabi nga kakarsadahan an temporaryo nga igsasarado samtang gindudumara an repair ngan road reblocking activities.
Mahitungod hine in gin abisuhan han MMDA an publiko nga baybayon nala an iba nga mga alternatibo nga ruta agud dire disturbo.
Aabrihan naman an mga nasabi nga karsada ha Aug 27, alas-5 han aga.
