NATIONAL – Gin-anunsyo han Department of Agriculture (DA) an temporaryo nga pag-ban ha pag-angkat han mga domestic ngan wild chicken tikang ha Maryland ngan Missouri ha U.S.
An nasabi nga pitad in kaparte han paningkamot han buhatan nga mapugngan an pagsarang han H5N1 highly pathogenic avian influenza (HPAI), nga malaksi nga nagsasarang ha Estados Unidos.
Lakip ha mga igin-didiri an mga produkto han Karne, bunay, mga pisu ngan semen han hayop tikang na nasabi nga mga lugar.
Ha ilarom han memorandum order no. 7, panuyo hini nga proteheran an populasyon han mga manok ha Pilipinas kontra ha nasabi nga virus. Gin didid-an gihapon hini an pagpagawas hin sanitary ngan phytosanitary import clearance para ha mga poultry products tikang ha Maryland ngan Missouri.
Pero ha kaluyo hini, an mga kargamento nga naibiyahe na o ginkarawat na ha mga pantalan in tutugutan nga makasulod ha nasud, basta diri pa maabot ha 14 kaadlaw antis maisumat an nasabi nga outbreak.
Han naglabay nga semana, igin-patuman gihapon han DA an pag-ban ha pag-import han mga produkto ha South Dakota, USA ngan pira nga rehiyon ha New Zealand tungod han magkabulag nga mga outbreak han avian influenza.
