NATIONAL – Padayon nga ginaadman ngan ginstu-studyohan han Department of Agriculture an mga posible nga rason kun kay-ano nagpapabilin nga hitaas an presyo han mga produkto hiton baboy ha merkado.
Basar han pan-inspeksiyon han departamento kaupod an pira nga opisyal hini ngan pira nga opisyal gihapon tikang ha Department of Trade and Industry, nakita han sekretarya nga mayda problema ha presyuhan han mga karne han baboy kun diin nagpapabilin ini ha P420/kilo an pamaligya hini.
Basar han datos han mao nga ahensiya haros P100 an paghitaas han presyo ha nasabi nga produkto, nakakarawat gihapon an buhatan nga daw aada ha retailers an problema.
Samtang, usa naman nga reklamo nga ira nakarawat in mayda problema ha middle man ngan an farm gate prices han karne hiton baboy.
Mahitungod ha mga nasabi nga rason, ginmalatumat han ahensiya nga kinahanglanon nira kitaon iton iton presyo agud magpabilin nga patas para ha iba panga sektor han pork industry.
Samtang, ginlalauman naman nga makakapagpagawas hin desisyon an departamento ha pagtutudlok hin maximum suggested retail price ha mga presyo han karne hiton baboy ha merkado ha bulan hiton Marso. Ini in depende gihapon kun komportable na an ira ahensiya ha mga datos agud dire magsayop ngan waray maapektaran nga sektor ha ira igpapagawas nga desisyon.
