NATIONAL NEWS – Ginbuyagyag ni Department of Agriculture (DA) Undersecretary Asis Perez an syahan nga pagrekomenda han ahensya nga umento pa ha taripa han bugas hin kutob ha 50%.
Ha usa nga pagdungog ha Senado nga ginpangunahan han Senate Committee on Agriculture, Food and Agrarian Reform, ginpahayag ni Usec. Perez nga an anay rekomendasyon nira in an 50% nga pag-umento ha taripa han bugas pero kabaliktaran daw an nahitabo.
Tikang ha 50% nga umento in nagkamay-ada hin pag-iban ngan umubos an taripa hin kutob ha 15% na la.
An nasabi nga rekomendasyon daw in ginbuhat ha atubangan han Committee on Tariff and Related Matters, usa nga Cabinet-level inter-agency committee nga naghihingaday ha mga isyu kasumpay ha taripa. An rekomendasyon hine in ginsalawad ha National Economic and Development Authority (NEDA) board, nga gin mamanguluhan naman han Presidente han nasud.
Ha kaluyo hine in gin kunsulta daw gihapon han DA kasumpay han pag-ubos han taripa ugsa ine maaprubahan.
