NATIONAL – Ginpahimatngunan han Department of Agriculture an mga nagbabaligya hin napakamahal nga presyo han karne han baboy nga nasaka ha P450 kada kilo kutob P480 kada kilo ha mga merkado.
Sumala kan Agriculture spokesperson ASec. Arnel de Mesa, maglilibot iton ira ahensiya ngan kakadtuon an mga lugar nga nagbabaligya ha hitaas nga presyo ha mga karne han baboy ngan sisitahon an mga ini.
Dugang pa hini nga basar han ira konsultasyon ha hog industry stakeholders, nagawas nga dire resonable an nasabi nga mga presyo.
Samtang, agud masolusyonan an hitaas nga presyo ha baboy, nauna nga ginmalatumat han DA nga posible nga maghimo ini hin manufacturer’s suggested retail price ha Marso agud makabulig nga mapahamubo an pagsaka han presyo han karne hiton baboy.
Kikitaon gihapon han ahensiya an posibilidad han pagbabaligya hin mas barato nga karne han baboy kumo alternatibo nga option ha mga konsyumer.
