NATIONAL- Ginpagdisisyunan han Senate Blue Ribbon Committee nga i-cite in contempt hi Curlee Discaya, mahuman ine nga magbinuwa kasumpay ha dire pag-atinder han iya asawa nga hi Sarah Discaya, ha hearing yana nga adlaw kasumpay ha mga iregularidad ha proyekto han flood control.
Ha syahan nga pahayag ni Curlee Discaya, ginmalatumat hine nga waray maka-atinder an iya asawa matungod nga mayda ine gin-aabat ha iya panlawas.
Pero ginbalabgan naman ine hin usa nga surat tikang kan Sarah Discaya mismo, nga nagpapahayag nga dire hiya makaka-atinder matungod nga naka-schedule na an iya meeting ha mga empleyado han ira kompanya.
Matungod hine, posible nga umatubang hi Curlee Discaya hin pagkakapreso ha Senado kumo kaparte han contempt powers ha komite.
