TACLOBAN CITY – Padayon an pagpatuman han ira mandatos han City Social Welfare and Development Office han syudad han Tacloban agud maproteheran an mga biktima han pan-aabuso labi na ha mga kababayin-an ngan kabataan.
Sumala kan City Social Welfare and Development Office Shelter Head, Madelyn Ebin, andam an ira shelter nga mag-atiman ha mga biktima, kun diin magkaduru-dilain nga mga pitad an ira ginbubuhat sugad nala han rehabilitasyon agud tambalon trauma nga gin-aagian han mga biktima labi na han mga kabataan.
Gin klaor naman ni Ebin nga an Violence Against Women and Children (VAWC) Law in dire la eksklusibo para ha mga kabataan ngan kababayin-an.
Pwede gihapon ig reklamo an mga nanay nga dire nagtutuman han ira mga responsibilidad ha ira pamilya, kun diin pagtalapas ine ha RA 9262 o Anti-Violence Against Women and their Children Act of 2004 o RA 7610 o Special Protection of Children Against Abuse, Exploitation, and Discrimination Act.
Gin-aaghat naman hine an mga molupyo nga ig report haira o ha mga nahitutungdan an bisan anu nga klase hin pan-aabuso sugad han sexual abuse o exploitation.
