Nabuhian hin paglaum an Team Croatia mahuman hini igpadaog an mulay kontra ha koponan han Panama, kakulop nga adlaw, Hunyo 24.
Ugsa ini, parehas pakyas nga an duha nga koponan ha ira mga nauna nga mulay ha group stage.
Ha pag-aatubang han duha nga koponan ha Toronto Stadium, nagin pisikalan an ira mulay nga nagresulta hin pagpagawas han referee hin yellow card para ha magkaluyo nga team.
Nagpadayon an mahugot nga mulay hasta ha mahuman an first half nga parehas scoreless, 0-0.
Pagsulod han halftime, naghimo hin substitution an Croatia ngan ginsulod hi Ante Budimir kumo striker.
Pag-abot han ika-54 kaminutos, nahimo ni Budimir nga saluhon an usa nga maupay nga low cross tikang ha teammate nga hi Josip Stanišić, tikang ha luyo han depensa han Panama.
Dayun hini nga ginsipa hin makusog an bola ngan nakasulod ha goal han kalaban agud igposte an kalamangan ha 1-0.
Upat kaminutos pala hi Budimir ha sulod han pitch mahuman hiya igsulod kumo substitute han mahimo niya an importante nga goal.
Waray na makagdugang hin goal an bisan hin-o nga koponan ngan nahuman an mulay ha 1-0. Kinahanglan naman maipadaog han Croatia an masunod hini nga mulay o makaghipatik hin mas damo nga goals agud makasulod ha masunod nga round.
