TACLOBAN CITY – Narescue an “critically endangered nga Philippine Eagle mahuman ini aksidente nga mabitik ha kakahuyan han Brgy. Caraycaray, Maslog Eastern Samar.
Sumala ha report tikang ha Department of Environment and Natural Resources ( DENR) Regional Office 8, gindara ini nga tamsi han usa nga anak hin parag uma ngadto ha balay ni Maslog Vice Mayor Septimio Santiago dida han nakalabay nga Hunyo 17 mahuman ini madakop pinaagi hin bitik nga para kunta han mga manok.
Dayon naman nga ginreport han mao nga opisyal an insidente ha DENR pinaagi han Community Environment and Natural Resources Office – Dolores (CENRO Dolores) nga amo an nakakasakop han lugar.
Nagpadara liwat an DENR Regional Office ngan Biodiversity Management Burea hin team para ma-eksamin an tres anyos nga Philippine Eagle.
Bisan paman kon maupay an kondisyon hini, nagdesisyon an DENR nga igturn over ini ha Philippine Eagle Foundation Center dida han Hunyo 26 para hin rehabilitasyon.
Igbabalik liwat ini ha iya natural habitat ha Maslog, Eastern Samar mahuman an rehabilitasyon ngan eksaminasyon hini.
Sumala kan Atty. Crizaldy M. Barcelo, DENR Regional Executive Director, iton presensiya han Philippine Eagle ha rehiyon in usa nga senyales nga mayda pa nasasalin nga mahimsog nga kakahuyan ha Sinirangan Bisayas pero usa liwat nga dako nga ayat an magprotekta han mga ini.
“Sightings of the Philippine eagle is extremely rare and protecting them is a challenge. Its presence in our region is a testament that we still have healthy forests which we need to sustainably manage and protect,” pahayag ni Barcelo.
Mababaruan nga urhi nga nakit-an an Philippine eagle ha kakahuyan han Calbiga, Samar ngan Taft, Eastern Samar dida han nakalabay nga Setyembre 2014.
Dida liwat han 2013, usa gihapon nga Philippine eagle an nakit-an hirani ha boundary han Baybay City, Burauen ngan Albuera, Leyte .
Han pareho nga tuig, mayda gihapon pipira nga mga report nga mayda ini nesting site ha kakahuyan han Eastern Samar.
Mababaruan nga igindidiri an pagdakop han Philippine eagle ha ilarom han Philippine Wildlife Conservation Act of 2001 (Republic Act 9147) kon diin mayda hini penalidad nga 12 anyos nga kaprisuhan ngan multa nga maabot hin usa kamilyon.
