ENTERTAINMENT – Gin anunsyo han mga organizers han Miss Universe Philippines (MUPH) 2025 an petsa han ginpapamulat nga coronation night nga pagbubuhaton ha Mayo 2, 2025 ngan magtitikang hiton alas-6 hiton gab-i ha kilala nga mall ha Pasay City.
Samtang, an mga detalye kasumpay ha pag-palit han ticket in igpapagawas ha masunod nga adlaw, subay ha usa nga post ha social media han MUPH.
Yana nga edisyon naman han MUPH in ginkokonsidera kumo ‘Puksaan’ edition mahitungod ha mga previous queens nga bumulig ngan ginkokonsidera kumo ‘magkusog.’
Labot ha mga bag-o nga nawong, kaupod ha presente nga batch an mga batikan nga beauty queens sugad kanda Reina Hispanoamericana 2017 Winwyn Marquez, Miss Earth Air 2023 Yllana Aduana, Miss International 2018 first runner-up Athisa Manalo, ngan anay Binibining Pilipinas Globe Chelsea Fernandez.
Samtang, pagmamanguluhan naman ni anay 2013 Miss Universe 3rd Runner up Ariela Arida an MUPH 2025 kumo bag-o nga tudlok nga national director nga bumalyo kan Shamcey Supsup.
