TACLOBAN CITY – Patay an usa nga construction worker mahuman nga pusilon ine han waray pa kakikilal-e nga suspek.
Ginkilala an biktima kan Kayron Deguiño alyas “Da-oy”, 18-anyos an pangidaron, usa nga construction worker ngan residente han Brgy. Hamorawon Calbayog City.
Sumala kan PCpl. Wilfredo Monsanto Jr. Duty Investigator han Calbayog City Police Station, usa nga witness an nakakita ngan nagreport han patay nga lawas han biktima kun diin nakabulagta ine dida han kalsada.
Basar han inisyal nga imbestigasyon han kapulisan, usa nga buto an nabatian an mga residente han nasabi nga barangay pero waray la daw an mga ine manginano mahitungod han kahadlok.
Nakuha naman ha lugar han panhitabo an usa nga kabug-os nga kalibre 45. Samtang gindara naman an patay nga lawas han biktima ha usa nga punerarya para igproseso.
