TACLOBAN CITY – Padayon an ginbubuhat nga plano para han nakatalaan nga pagtitindugon nga condominium style o kun medium rise building nga mga pabahay han City Government han Tacloban kaupod an National Government.
Sumala kan Ted Jopson, Head City Housing and Development Office, diri na hira naruruyag nga magtindog han mga raw houses o kun an mga pabahay nga baga baga hin subdivision nga style.
Ini daw in mahitungod nga an syudad han Tacloban in mayda la limitado nga sukol han teritoryo nga aada ha 22,000 ka hectares an syudad nga kun diin guti la daw ini.
Dugang pa ni Jopson nga kun an low cost housing in an iya maximum payment in aada ha 500,000 ka pesos, in ini hiya nga medium rise building in aada ha maximum nga 750,000 ka pesos tikadto ha 1.5M ka pesos an kada unit, nga kun diin, an iya magigin monthly amortization o an magigin kabaraydan han kada bulan in aada ha 6,000 ka pesos.
Pero puydi an bisan hino nga naruruyag nga mag avail o didto umukoy mahitungod nga sentro an syudad han Tacloban nga ginbibisita han mga katawhan nga nagtikang ha magkadurudilain nga mga lugar ha Sinirangan Bisayas.
