NATIONAL – Iginreklamo ni Philippine Coast Guard (PCG) spokesperson for the West Philippine Sea (WPS) Commodore Jay Tarriela an blogger nga hi Sass Rogando Sasot mahitungod ha cyberlibel, kakulop nga adlaw, Hunyo 4.
Gin kumpirma naman ine han PCG official ha iya X account.
Iginsalawad ni Comm. Tarriela an nasabi nga reklamo ha Manila Prosecutor’s Office kaupod an Movement Against Disinformation (MAD).
Subay ha reklamo nga ginsalawad han PCG official, nag-post daw hi Sasot hin “scurrilous libels” o nakakapan-ruba nga pahayag kontra ha iya ha social media account han nasabi nga blogger nga nag-aakusa ha PCG official hin panunuhol, korapsyon, ngan panlimbong.
Sumala pa kan Tarriela, gin akusahan hiya ni Sasot hin pagkarawat daw hin $4 million nga talent fee tikang ha Amerika ngan salapi tikang kan House Speaker Martin Romualdez.
Gin tag gihapon daw hiya han blogger kumo Philippine Military Academy cheater.
Pero sumala kan Tarriela, an ngatanan han mga alegasyon kontra ha iya in waray kamatuuran ngan waray anuman nga legal nga basaranan.
Kasumpay hine, ginghangyo han PCG official an sobra P1 million nga kabaraydan kumo bayad ha danyos han pan-guba ha iya ngaran.
