TACLOBAN CITY– Nagpapadayon an pangarawat hiton Comelec Tacloban, ha mga magpaparehistro nga mga indibdwal para tidaraon nga Barangay ngan Sanguniaang Kabataan Election sunod nga tuig.
Sumala kan Atty. Ramon Dadulla,Comelec Officer Tacloban City, purluminos 500 na an ira kapot nga ihap han mga nagparehistro tikang han Oktubre 20 syahan nga adlaw han pag-abre han voters registration han Comelec.
Dugang pa ni Dadulla, an nasabi nga ihap in kutob pala han Nobyembre 18 yana nga bulan, ngan ginlalauman pa nira nga madudugangan matungod nga nagpapadayon paman an ira pangarawat ngan pagka-abot han mga maparehistro.
Gindig-unan hine nga hamubo ine nga ihap kumpara han nakalabay nga Agusto kun diin nakaghipatik hira hin sobra 5,000 nga registrants an ira nakarawat.
Ginlalauman naman han ira buhatan, nga madamo an magpaparehistro ha oras nga harani na an nakatalaan nga paghuhuman han registration.
Ginmalatumat naman hine nga dako an naibubulig han satellite registration, kun diin an ira buhatan mismo an napakadto ha mga barangay agud nga makagdumara hin panrehistro, ine nga pamagi in nakakabulig nga madugang-dugangan an ihap han mga botante nga rehistrado.
