TACLOBAN CITY – Nagpahinumdom an Commission on Elections (COMELEC) Regional Office 8 ha mga botante nga pwede an mga ini nga magdara hin listahan han ira mga bobotosan agud nga dire mag-iha ha sakob han mga polling precincts o mga presento ha adlaw hiton piniliay yana nga Mayo 9.
Sumala kan Jenette Fariola Ruedas, tagapagyakan han COMELEC Regional Office 8, nagtutuo hira nga sadang an gin-alutaga nga oras tikang alas sais hiton aga kutob ala siete hiton gab-i para makabotos an mga botante ha adlaw han eleksyon.
Dugang pa hini nga napulo la nga botante an pwede nga makabotos hin durungan ha sakob hiton presinto agud nga maobserbar la gihapon an physical distancing ngan iba pa nga mga health protocols kontra COVID-19.
Waray naman oras o gin alutaga nga pira la kaminutos pwede nga bumotos an usa nga botante sanglit ginsasagdon nira nga magdara an mga ini listahan o kodigo han ira mga bobotosan agud nga dire mag-iha ha sakob han presinto.
Nanawagan gihapon ini ha publiko nga magtimprano ha pagbotos ngan dire na hulton pa an alas sais o ala siete hiton gab-i ha pagkadto ha mga polling precincts.
