NATIONAL – Nakarawat na han Clerk of Court, kakulop nga adlaw, Hunyo 27, an dokumento nga nagsusulod han reply han House prosecution panel ha answer ad cautelam o baton ni Vice President Sara Duterte ha gin isyu nga writ of summons ha iya.
Hi Senate Secretary Renato Bantug, nga natindong nga clerk of court han impeachment court an kumarawat han mga dokumento eksakto ala-1:38 han kulop.
Ada ha 37 pages an dokumento nga baton han prosekusyon kaupod na an signature pages.
Sumala kan Bantug, kompleto na nira nga nakarawat an mga dokumento nga nagsusulod han answer ad cautelam ni VP Sara ngan an baton hine han prosekusyon.
Ha Lunes naman in tatagan ni Bantug hin kopya an kada senador mahitungod nga ha weekend in waray naman makarawat ha ira mga opisina.
Sugadman, nakadepende na ha impeachment court an masunod nga magigin pitad yana nga naipasa na an mga dokumento tikang ha duha nga partido.
