TACLOBAN CITY- Ginpahibaro han pamunuan han Traffic Operation and Management Enforcement Control Office TOMECO, nga nagkamayda hira hin clearing opeation mga naka-double parking ha pira nga mga highway ha syudad han Tacloban.
Sumala kan Engr. Garry Soriano, Head han TOMECO Tacloban, nga partikular nga ira ginlimpyohan an ha may Brgy. 6-A Sto. Niño Extension ,kun diin kaugdan nga damo an mga naka-double park mao nga barangay.
Dugang pa han mao nga opisyal, ine in kasumpay ha ginhangyo han Barangay Kapitan han mao nga barangay ha ira buhatan matungod nga damo an nakakaulang nga mga nakaparking ha mga umaragi nga mga sarakyan pakadto ha ira mga distinasyon o trabahuan.
Ginmalatumat han mao nga opisyal nga kasugbong han pira nga mga ahensya han syudad in gintutukan an mao nga problema agud nga magkamayda dayon hin kabatunan an mao nga himangrawon.
Mababaruan nga nagtudlok naman hin mga tinaglawas an TOMECO nga nakatuka ha mao nga area agud nga siguraduhon nga waray na ma-utro nga mag double parking.
Nagbutang gihapon an ira buhatan hin mga pahibaro sugad hiton signage para ha mga motorista ngan mga tag-iya ha mga pribado nga sarakyan nga bawal na nga mag parking ha mao nga area.
Maatubang naman ha kaangyan nga penalidad an masasakban nga mautro pa nga ig park an ira mga sarakyan ilabi na kun double parking na ine.
