TACLOBAN CITY – Ginsisiguro han mga kasundaluhan han 8th Civil Military Operations Battalion nga padayon an ira pagdumara han ira peace and development efforts ha mga lugar nga nasasakupan hini ha kaluyo han padayon nga ginkakaatubang nga COVID-19 pandemic.
Sumala kan Lt. Col. Emmanuel Garcia, Commander han 8th Civil Military Operations Battalion han 8th Infantry Division, Philippine Army, primero nga responsibilidad nga ira gintutuman an pakipagsumpayan ha mga barangay ngan local officials ha mga tay-aw nga barangay nga hitaas an risgo ha panhulga han mga New Peoples Army (NPA).
Aminado naman an mao nga opisyal nga han pagbutho han pandemya in tigda gihapon nga huminay an gius han ira operasyon tungod nga damo nga mga katawhan an dire nakakagawas tungod han kahadlok nga matapnan han virus.
Nagpatuman gihapon hin mga restrictions an mga local government units agud nga dire makasakob ha ira mga bungto an mao nag virus.
Ha kaluyo hini in nagpapasalamat naman an mao nga opisyal ha mga LGUs nga padayon an pakipagsumpayan ha ira agud nga maging hapsay an pagpatuman han ira mga programa ngan operasyon ha kaluyo han nagpapadayon nga pandemya.
