TACLOBAN CITY – Nagpapadayon an mga pitad ngan aktibidad han Tacloban City Nutrition Office may paghisumpay han selebrasyon han Nutrition Month yana nga bug-os nga bulan han Hulyo.
Sumala kan Malou Tabao, head han City Nutritions Office han Tacloban, tungod nga dire man igintutugot an dagko nga mga katitirok, iba an ira mga ginlatag nga aktibidad kasumpay han Nutrition Month yana nga tuig.
Nakasentro an selebrasyon han Nutrition Month yana nga tuig ha tema dire la ha nutrisyon han kabataan kundi pati na gihapon ha COVID-19 ngan kun patiunan-o mapapakusog an resistensya ala kontra ha mao nga sakit.
Kasumpay hini, pira ha mga pitad han City Nutrition Office an paghatag hin handmade facemask, alcohol, towel ngan sabon ha maabot 400 nga mga kabataan.
Nahibaruan nga an bug-os nga bulan nga selebrasyon han Nutrition Month in nakapailarom ha tema nga “Batang Pinoy SANA TALL… Iwas stunting, SAMA ALL!” Iwas ALL din sa COVID-19.
