TACLOBAN CITY – Iginkapausa han City Government han Tacloban nga nahaupod an siyudad ha mga lugar nga igpapailarom la gihapon ha General Community Quarantine ha sakob hin 30 diyas.
Sumala kan Atty. Aldrin Quebec, City Administrator, diri hira nagdadahum nga mahilalakip an siyudad ha mga igpapailarom ha GCQ extension matungod nga humabubo na an kaso han COVID-19 ha Tacloban.
Nagtotoo naman hira nga may rason hi Presidente Rodrigo Duterte ngan an IATF kun kay anu nga igin extend an GCQ ha siyudad.Dugang pa hini nga abre naman ha mao nga kamanduhan an siyudad basta tugutan la an LGU nga magpatuman hin gutiay nga adjustment agud nga makagpadayon an operasyon han mga negosyante agud nga dayon nga makabawi an ekonomiya han siyudad.
Mababaruan nga mahagos pa kutob ha Nobyembre 30 an pagpabilin han siyudad han Tacloban ha ilarum han General Community Quarantine (GCQ).
