Nagpasaka hin reklamo nga obstruction of justice an Philippine National Police-Criminal Investigation and Detection Group (PNP-CIDG) kontra kan Senador Robin Padilla ngan iba pa nga indibidwal kasumpay han daw pagbulig ha pagtakas ni Sen. Ronald “Bato” Dela Rosa.
Ginkumpirma ini ni Prosecutor General Richard Fadullon nga ginsumite an reklamo ha Department of Justice dida han Huybes han kulop.
Nauna na nga ginanunsyo han CIDG dida han Miyerkules an plano hini nga pagsumite han kaso kontra kan Padilla ngan iba pa nga personalidad mahitungod ha daw pagbulig kan Dela Rosa nga maka-eskapo ha mga otoridad.
Mahugot naman ini ginpanhimuwa ni Padilla an alegasyon. Sumala ha Senador, waray niya buliga hi Dela Rosa nga makatakas, iya la ini ginpasakay ha iya sarakyan pagawas han Senado dida han kaagahon han Mayo 14 mahuman ini makidungan.
Samtang, ginmalatumat han CIDG nga may koneksyon an insidente han panmusil ha Senado ngan an pag-eskapo ni Dela Rosa.
