NATIONAL – Gintagan han Cybercrime Investigation and Coordinating Center an mga online influencer ngan content creator nga tanggalon an bisan ano nga post nira nga nagpo-promote hin ilegal nga online gambling sites.
An ultimatum in kaparte han mas ginpahugot nga kampanya han CICC, kaupod an Digital Pinoys, kontra ha nahurak nga operasyon han ilegal nga online gambling ha nasud.
Sumala kan Asec. Aboy Paraiso, CICC Deputy Executive Director, nga yana in may 20 nga influencers na an ira gintutukan nga nag-eendorso hin illegal online gambling sites.
May iba nga content han mga ini nga pag-ulpot ha butnga han ira vlog in tigda nga ginsisingit an link han mga online gambling sites.
Padadad-an nira hin surat an mga influencers nga ha masunod nga semana in papasakahan nira an mga ini hin kaso kun dire masugot.
Samtang nanawagan naman hi Ronald Gustilo han Digital Pinoys ha mga influencer nga ig-undang na an pag-e-endorso han illegal online gambling matungod nga mayda mga krimen nga natatabo ha nasabi nga online activities sugad hiton phishing ngan pagkawara han kwarta han mga mananaya ha pamamaagi han manipulasyon ha resulta han mulay.
