NATIONAL – Nagpasalamat hi Presidential Communications Office (PCO) Secetary Cesar Chavez ha Kamara de Representantes ha malaksi nga paglusot han sobra P2.2-B nga budget han ahensya para ha Fiscal Year 2025.
Sumala kan Communications Secretary Chavez, mahitungod ha pagtapod nga iginpakita han mga magbabalaod han ahensya nga waray may kumontra in mas pag-uupayon pa daw han PCO an ighatag ha publiko nga serbisyo nga igin patapod hine ha mga Pilipino.
Dugang pa hine, makakalaom daw an publiko nga kada sentimo han pondo in epektibo nga magagamit han nasabi nga buhatan, para ha mga plano ngan programa hine, nga nasusubay ha balaod.
Kasumpay hine, ginkilala gihapon han sekretarya an bug-os nga suporta han Kamara ha mga bag-o nga programa han PCO nga daw, an pangunahon nga mandato in nakatutok ha pagpapagawas han mga pahayag o impormasyon nga tinuod ngan napapanahon, kasumpay ha mga serbisyo ngan programa han gobyerno.
Gintagan duon naman han sekretarya nga an madagmit nga pag-apruba han ira budget in maikokonsidera nga “vote of confidence’ ha ira misyon.
