Gin klaro han Malakanyang nga dire pa napapag-istoryahan ha anuman nga pagharampang an isyu han Charter Change o pag-amyenda ha Konstitusyon.
Sumala kan Palace Press Officer Undersecretary Claire Castro, ha presente in dire pa natatagan hin atensyon han Presidente an mga suhestyon han pira nga magbabalaod kasumpay han Charter Change, magin ine man in political ammendments o an economic provisions.
Pag-eksplikar ni Castro, kun mailalatag an konkreto nga sulod han mga panukala, in amu pala ine pwede pag-adman ngan pagdesisyonan ni Presidente Ferdinand Marcos Jr.
Samtang, ha pakiana kun susuportahan han administrasyon an usa nga plebisito in kaso magkamay-ada hini, ginmalatumat ni Castro nga ini in nakadepende ha magigin sulod han Charter Change.
Ha yana, iginduon Malakanyang nga waray pa anuman nga paghingaday kasumpay hini.
Ha Kamara, agresibo nga iginduduso ni Deputy Speaker Ronaldo Puno an Charter Change pinaagi han usa nga Constitutional Convention.
Panuyo hini nga ig sakto an mga “malabo” ngan “may kakulangan ha proseso” nga probisyon han 1987 Constituition partikular ha mga istoryahon han impeachment, voting procedures, ngan Judicial and Bar Council.
Iginduon ni Puno nga kinahanglan hin klaro ngan hap-id nga mga probisyon agud malikayan an pagkalipong ngan dire pagkakaintindihay ha pagpapatuman han balaod.
