NATIONAL–Ginpahayag han Malakanyang han Sabado, ika 31 han Enero, nga dire gin-iistoryahan ha pagkayana an Charter Change (Cha-Cha) o proseso han pag-amyenda ha 1987 Constitution.
Sumala kan Palace Press Officer Usec. Atty. Claire Castro, ha urhi nga pakikpagtirok han Pangulo ah economic team han Biyernes, waray nahisgotan an kasumpay han Cha-Cha.
Ha kaluyo hini, nakapokus hi Pangulong Ferdinand Marcos Jr. ha pag-angat han ekonomiya han nasud.
Pero, ginmalatuamt ni Castro nga kun pananglitan mayada na nabuhat nga pitad an mga mambaralaod kasumpay han nasabi nga istorya, iistudyohan naman ini han Presidente.
Ginbuhat han Palace official an pahayag mahuman han pronouncement ni Senate President Vicente “Tito” Sotto III nga susuportahan niya an mga plano agud nga amyendahan an 1987 Constitution panaglitan man igduso ini.
Mababruan naman nga basar ha report han Philippine Statistics Authority (PSA) ha gios han ekonomiya han 2025, nahuman an tuig nga mayada la 4.4% nga gross domestic product (GDP), nga ikatulo nga sunod nga tuig nga waray naabot han gobyerno an target hini mahitungod ha epekto han mga kalamidad ngan flood control corruption scandal nga nakaapekto ha kumpyansa han mga investor ngan consumer.
Kasumpay hini, ginmalatumat ni Department of Economy, Planning, and Development (DEPDev) Secretary Arsenio Balisacan puspusan an ginbubuhat nga pitad han gobyerno agud nga bumalik an pagtapod han publiko.
