Maduon nga igindiwara ni Senate Minority Leader Alan Peter Cayetano nga naghangyo hiya hin “ceasefire” kan Sen. Panfilo “Ping” Lacson kasumpay han ira away ha isyu han gin aalegar mga “ghost projects” ha Taguig City.
An pahayag ni Cayetano in baton ha nagin social media post ni Lacson nga nagpahayag nga mayda usa nga senador an “pabulong” nga nangaro hin “ceasefire,” sugadman in waray ini ginpahayag nga ngaran.
Sumala kan Cayetano, mayda pira nga senador an nagpahayag hin pagkabaraka nga an ira balyuay hin akusasyon in posible nga makaruba ha imahe han Senado, mailikay an atensyon ha mas importante nga istoryahon, ngan makaapekto ha interes han publiko.
“Noong ako’y nagsasalita, ang daldal ko raw… Noong tumahimik naman ako… baka guilty. Tapos ngayon sasabihin na humihingi ako sa kaniya na itigil na. Hindi po,” sumala kan Cayetano.
Iginduon pa han senador nga mas importante nga tagan hin pansin an mga isyu sugad han itaas nga presyo han kuryente nga lana, online gaming, ngan vape kumpara ha personal nga away.
Ginmalatumat gihapon ni Cayetano nga andam hira atubangon an anuman nga alegasyon nga iginbabatak kontra ha iya.
