TACLOBAN CITY – Ginpahayag ni Catbalogan City Mayor Stephanie Uy Tan nga andam hiya nga lumusad ha pwesto kun makarawat na niya an unom kabulan nga suspension order kasumpay han pagpalit hin pribado nga tuna ngan pagpapapleti han city public market.
Ha gindumara nga press briefing, ginpahayag han mao nga alkalde nga waray pa hiya may nakakarawat nga suspension order tikang ha Office of the Ombudsman ngan padayon an iya pagserbi kumo city chief executive.
Ginpatapod gihapon hini nga waray hiya bubuhaton nga pitad para pudngan an pagserbi han suspension order tikang ha Ombudsman ngan diri liwat hini pupugngan an mga molopyo nga sumuporta ha iya.
Sumala kan Mayor Uy-Tan nga kun mai-serbi na an suspension order, aakseptaron niya ini para magpadayon iton imbestigasyon.
Samtang, ginpahayag naman hini nga ha kaluyo han ginkakaatubang hini nga isyu, padayon la gihapon an implementasyon han mga nakatalaan nga proyekto han city government.
Nahibaruan nga han nakalabay nga bulan, gin-aprubahan ni Ombudsman Samuel Martires an preventive suspension kan Uy-Tan kaupod an pira nga mga city council officials ngan iba pa nga mga empleyado ha sakob hin unom kabulan mahitungod ha abuse of authority, grave misconduct ngan gross neglect for purchase of land from private individuals.
Nag-ugat an kaso tikang ha pagpalit han city council hin walo ka ektarya nga agricultural land nga gintatag-iyahan ni Alvin Cesar Laohoo ngan Lorenzo Laohoo Jr. ha kantidad nga PHP120.225 million, kon diin mas hitaas daw an market value hini ha PHP155,497.84 ha tuig 2016.
Samtang, iginpahimuwa naman ni Uy-Tan nga overprice an napalit nga tuna. Kon huhuna-hunaon daw in nag-income pa ngani an syudad tungod nga napalit la ini nira ha kantidad nga PHP1,500 kada square meter, mas hibubo ha PHP3,500 ngadto ha PHP8,000 nga price offerings ha mga propyedad ha Catbalogan.
Labot la hiton alkalde suspendido gihapon hi Vice Mayor Art Gabon; mga konsehal nga hira Coefredo Uy, Jeffry Uy, Maximo Pescos, Edward Uy, Christine Joy Escobar, Beethoven Bermejo, ngan Nanette Jasmin; sugad man hi City Assessor Romero Tuazon; Assistant City Assessor Arthur Macabare; ngan Office of the City Assessor employee Rizal Ignacio.
Ginkokonsidera naman ni Mayor Tan nga may kalabutan ha pulitika an ginsalawad nga kaso ala kontra haiya kon diin ginyaknan pa daw hiya han iya mga kalaban ha pulitika nga mas damo pa nga kaso an iya kakaatubangon.
Tungod hini nga suspension order, nagdesisyon an pamilya ni Tan nga magin substitute candidate para haiya hi Dexter Tan, usa nga law student,ngan anay Sanguniang Kabataan (youth council) federation president han Catbalogan City.
