INTERNATIONAL – Nasunog ngan nagkaada hin sagunsun nga pagbuto an Singapore-flagged cargo ship Wan Hai 503 samtang tikadto ha Mumbai, nga nagin hinungdan han pagkahulog han 40 nga container ha Arabian Sea ngan paglukso han 18 nga mga tripulante ha dagat agud makatalwas.
Sumala kan Shekhar Kuriakose han Kerala State Disaster Management Authority, natabo an insidente ha purluminos 144 kilometros tikang ha baybayon han Kerala, India, pero ginklaro han opisyal nga waray malunod an barko.
Basar naman ha pira nga hulagway nga iginpakita han Indian Coast Guard, makikit-an an madakmol nga aso tikang ha barko ngan mga naglulutaw-lutaw nga container harani ha gintikangan han kalayo.
Subay ha defense ministry, an nasabi nga barko in ha pagkayana in padayon nga naglalarab ngan aadto pa ha mao nga kadagatan.
Samtang, waray naman igin-anunsyo kun ano nga klase nga kargamento an sulod han mga container ngan padayon an gindudumara nga imbestigasyon han mga otoridad kabahin ha nagin tinu-od nga hinungdan han sunog.
Manunumduman nga usa nga container vessel an nalunod ha pareho gihapon nga rehiyon han nakalabay nga bulan nga nagresulta ha kalunod han 100 nga container ha dagat, pero waray nahipatik nga oil spill.
