CALBAYOG CITY – Gin kilala kumo Best Implementer of Ecological Solid Waste Management in Region 8 an Calbayog City ha gindumara 25th Signing Anniversary of Republic Act No. 9003 ha Quezon City dida ha nakalabay nga Enero 27.
An award nga gin organisa han Environmental Management Bureau han Department of Environment and Natural Resources, in ginkilala an padayon nga pagpapatuman han Calbayog City han recycling, upcycling, ngan community-based waste management practices.
Sumala kan City Solid Waste Management Office (CSWMO) Officer-In-Charge Jannett Obong-Cabujat, resulta han inobasyon ngan determinasyon han ira mga personahe an paghimo han mga pandekorasyon nga gamit tikang ha recycled nga plastik ngan mga lata ha material recovery facility han syudad.
Ha presente, mayda tulo nga materials recovery facility an Calbayog – Pilot, Central, ngan Market, kun diin gin manduhan gihapon an ngatanan han barangay nga magtindog hin kalugaringon nira nga pasilidad.
Ha kabug-usan nga 157 barangays, 148 na an nakasunod, nga nakabulig naman ha pagpapatuman han sakto nga pagbuburublag han basura ngan pag-iban han kadamo han basura nga gindadara ha final disposal.
Padayon gihapon nga nagdudumara an mga advocacy team hin mga briefing ha waste management ngan paghag-id ha upcycling ha mga barangay, iskuylahan, ngan negosyo.
Samtang, ginmamanguluhan han mga monitoring personnel an mahugot nga pagpapatuman han mga lokal nga ordinansa ha kalimpyo.
Dako gihapon an bulig han mga gintatawag nga ‘eco warriors’, kalakip an mga street sweeper, kolektor, drayber, ngan dispatcher — ha pagpapabilin han kalimpyo ha mga karsada, merkado, ngan parke. Ginpo-proseso naman an mga recyclable subay ha waste diversion goals han 2020–2029 Ecological Solid Waste Management Plan han syudad.
Dugang pa ni Obong-Cabujat, an pagkilala in resulta han gin urusa nga paningkamot, sakripisyo, ngan suporta han mga opisyal han barangay, volunteers, ngan mga residente ha pagpapabilin han mga inisyatiba ha kalimpyo.
Ginkarawat naman an pagkilala para ha Calbayog City nira Augusto Magdaraog ngan Jannett Obong-Cabujat, kumo tinaglawas ni City Mayor Raymund Uy.
