TACLOBAN CITY – Patay an usa nga aktibo nga miyembro han CAFGU mahuman nga pagpamusilon hin gintutuuhan mga miyembro han New Peoples Army (NPA) bungto han Jipapad, Eastern Samar.
Ginkilala an biktima nga hi Alexis Pajares, 25 anyos an pangidaron, residente han mao nga lugar.
Sumala kan Pol. Staff. Sgt. Ramil Señoso, duty investigator han Jipapad Police Station, nga subay ha ira inisyal nga imbestigasyon nga nanmamasahero hin habal-habal han tigda nala ini nga pagpusilon han tulo nga waray pa kakilal-e nga mga kalalakin-an.
Nag-angkon ini hin 19 nga igo hin bala ha magkadurudilain nga parte han iya lawas nga nagin hinungdan han iya dayon nga kamatayon.
Usa naman ha ginhihingita nga anggulo han mga kapulisan an gin-aalegar pagigin anay miyembro han rebelde nga grupo han mao nga biktima.
Ha pagkayana in nagpapadayon an gindudumara nga imbestigasyon han mga otoridad may paghisumpay ha mao nga insidente.
